L'autore
Giuanni Lilliu (Barumini, 1914). Archeolugu, at fundau e dirigiu Sa Scola de specializatzioni de istudius sardus de s’Universidadi de Castedhu. In custa Universidadi at operau comenti professori de ruolu ordinariu de Antighidadis sardas e est istetiu Presidi de sa Facultadi de Literas e Filosofia po binti annus. De su 1990 fai parti de s’Academia natzionali de is Lincei. De is medas operas pubblicadas arrergodaus: I Nuraghi. Torri preistoriche di Sardegna, Verona, 1962; La civiltà dei Sardi dal neolitico all'età dei nuraghi, Torino, 1963; Sculture della Sardegna nuragica, Cagliari, 1966; La civiltà nuragica, Sassari, 1982; Origini della civiltà in Sardegna, Torino, 1985; Cultura e culture, Sassari, 1995; Arte e religione della Sardegna prenuragica, Sassari, 1999; Le ragioni dell’Autonomia, Cagliari, 2002; La costante resistenziale sarda, Nuoro, 2002.



Il volume
In su piticu de custu traballu si sposant articulus de storia, de archeologia, de politica, de lingua, de morali, e amenidadis e imaginis chi dhu faint prus attraenti. Issu bolit essiri in is intenzionis e de fatu unu contributu, unu donu, un’omaggiu a sa lingua nostra e cun sa lingua a sa terra nostra, mama nostra, sa Sardigna.
(Giuanni Lilliu)

Tottu sos trettos chi forman s’identidade sarda Giuanne Lilliu los at contivizados, a cumintzare dae sa memòria istòrica fatta a sìmbulu, dae s’alabàntzia de su tempus coladu comunu. […] In su mentres chi pensaiat a sa "chistione natzionale sarda", iscriiat artìculos in sardu pro su periòdicu "Nazione Sarda". Como custos artìculos, imprentados in sos annos 1977-1981, paris cun unos cantos àtteros bessidos atterue e in parte manna in sos annos fattantes, sun accabidados in custu lìbberu, chi balet coment’e testimonia de un’esperièntzia nodida e imparu e ammonestu pro su tempus benidore. A sa fine de su lìbberu s’agattat puru, bortadu in sardu dae chie iscriet custas rigas, s’iscrittu de Giuanne Lilliu, connottu dae tottus e semper lumenadu cando si chistionat de sas raighinas de s’identidade sarda, chi isteit imprentadu in italianu in su 1971 cun su tìtulu La costante resistenziale sarda […] Pro sa Sardigna su camminu a fagher in cherta de s’identidade est ancora longu: unu bonu cumpanzu at a esser custu lìbberu de Giuanne Lilliu, su Babbai mannu de tottu sos Sardos.

(dae sa presentada de Giulio Paulis)